Tfeggeḍ teqbaylit, di yennayer, di Nogent sur Oise

Crédit photo: Mack Nat Frawsen | inaẓuren iqbayliyen cennun Matoub Lounes di Nogent Sur Oise
Sssebt iɛeddan, tadukli Imaziɣen n Oise, thegga-d yiwet n tejmilt i sin inaẓuren meqqren Slimane Azem d Ccix Lḥesnawi. Tameɣra ḥedren-tt waṭas n inaẓuren : Rachid Mesbahi, Lounes Kaci, Kamel Syamour, tarbaɛt AmZik, Malika Yami d Cherif Hamani.

Am  deg waṭas n temnaḍin nniḍen, di tmurt n Fṛansa, leqbayel yellan di Nogent Sur Oise, mugren ixef n useggas n Imaziɣen s ccnawi d wayen akk i ten-yesdukulen.

D ttmanya n yiḍ, abraḥ meqqren n tzeqqa Château des rochers yennfel seg yemdanen i d-yusan ad ḥedren i temlilit ara yuɣalen d tajmilt i snat n tgejda n ccna n teqbaylit : Slimane Azem d Ccix Lḥesnawi. Ɣef usayes, kullec ihegga ama d ttawilat n lmusiqa, ama d ttawilat nniḍen i ilaqen akken ad tɛeddi tmeɣra di tegnatin yelhan s lmendad n utwil Arezki Baroudi. Yuɣ lḥal, iɛeggalen n tdukla Imaziɣen n Oise, heggan-as acḥal n waguren-aya.

Imi d tiwuura n useggas, smenyafen akken ad sbeggnen azamul n yennayer ɣer Imaziɣen s umata. Imi akken i tenna Malha Ben Brahim, tamazrayt, di temlilit-agi : « Yennayer yeffel i tmura n tefriqt n ugafa, yunag akken unagen imezdaɣ-ines.Yal imi ara d-yeḥder, ttbeddilen medden imensi,  ttgen amur i uɣrib, i twellit d uɛessas n uxxam. Yennayer d akal, d idammen. Ass-a nessaweḍ leḥsab n iseggasen ɣer 2968, imi takadimit n Imaziɣen tɛeggen aseggas n 950 send talalit n sidna Ɛissa, d beddu n leḥsab ɣer Imaziɣen, di ddunnit meṛṛa.”

Ɣer Malha Ben Brahim, yennayer d tagnit daɣen akken ad issinen warraw n yeɣriben tamurt d wansayen nnsen. Ɣef waya I twelleh Dihya Ɛiden, yiwet n tlemẓit I ilulen di tmurt n Fṛansa, ad tɣer ayen tura s wudem n tussna, sakin ad t-id-terr d tugniwin. Ma yella rzan-d medden ɣer Nogent Sur Oise almi sen-yella deg wul wahil n yiḍ-nni.

Myufan inaẓuren, wid nni yesserwiwicen allalen n lmusiqa akken ilaq lḥal d at tbuḥcicin ḥlawen, I ɣ-d-yesmektan acḥal d tizlit wwin d acewwiq sin imeqqranen n ccna n teqbaylit: Slimane Azem d Ccix Lḥesnawi.  Rachid Mesbahi, ger wid I ten-ixulḍen, I ixedmen yid-sen abeɛda Slimane Azem. Yefren ula d netta kra n tezlatin I s yezzuzen ineḥdar, di tzeqqa n château des rochers. Ccnawi nnsen, zzuznent ula d ilmeẓyen nneɣ i  yewwin ass-a abrid nnsen, yerna cennun akken ilaq yecban Lounes Kaci. Taqbaylit-is, tiyita umundul d ccna-ines, beggnen-d aḥemmel I iḥemmel ayen akken I t-yessidiren. Ilemẓi yesseḍfar-d gma-s, d nnuba n Kamel Syamour.

Ula d netta, yewwi-tent-id akken ilaq. Yuɣ lḥal yerr-yasen yakan tajmilt di snat n tesfifin I yexdem “ Ccix” akked “Babaɣayu”. Kamel I yeǧǧan tamurt deg iseggasen n tesɛin, yessaweḍ ad yawi iman-is di ccna s wayen akk i t-yezdin d waṭas n ifennanen n tmurt-nneɣ I d-yemlal di lɣerba. Tameɣra tkemmel, tikelt-a, d nnuba-nnsen, di tlata yid-sen. Tesdukel-iten-id ccna, di tmurt n Franṣa, akken ten-tesdukel tmurt n leqbayel I ten-id-yefkan. Nonor, Karim, Didine. Tarbaɛt AmZik, I d-yufraren deg yiḍ nni ama s tezlatin I d-fernen ama s lmusiqa I si sent-ttbeddilen udem am yal tikelt. Iswi nnsen d aleqqem n wayen I d-ǧǧan d agerruj imezwura, s lmusiqat n ddunnit.

Ger wannect-a yak, teḥder tinna I yeččuren tiṭ I widen meṛṛa I yellan di tzeqqa, iḍ-nni. Xas akken tɣab ɣef widen I iḥemmlen ccnawi-ines tmenṭac n iseggasen, tuɣal-d s ifadden, akken ad teḥder I tejmilt-agi. Malika Yami, ula d nettat, s taɣect-is ḥlawen tezzuzen kra widen iḥedren di tzeqqa n château des rochers, di Nogent Sur Oise.Ɣer tagara, lferḥ yennekmal imi d-yuli win yessifiyen taqbaylit: Cherif Hamani. S lmendad n Urezki Baroudi, d terbaɛt-ines n lmusiqa, yeṣṣaweḍ tiɣri n Slimane Azem d Ccix Lḥesnawi ɣer kra n wid meṛṛa I iḥemmlen ccnawi nnsen.

Timlilit d tafenṭazit, tessawel I tayeḍ ara d-yilin ass n 24 di yunyu I d-iteddun di lberj n waddal, di Paris. Skud mazal tidukliwin d widen yeččan wul-nnsen ɣef teqbaylit, ala tudert ara tidir.

Tags from the story
, ,
More from Zira At Lhusin

Leave a Reply

Your email address will not be published. Required fields are marked *